दर्शन र राजनीति बिचको अन्तरसम्बन्ध

दर्शनले मानव जीवन र समाजका सबै क्षेत्रहरूलाई प्रभावित गर्दछ । दर्शनले मानव चिन्तनलाई परिष्कृत गर्दछ र त्यसलाई सही दिशा दिन्छ । तर दर्शनको कुनै सर्वसम्मत मत हुँदैन । त्यसमा विभिन्न प्रकारका मत भिन्नताहरू हुन्छन् । एकातिर दर्शनले मानिसहरूको चिन्तनलाई प्रभावित गर्दछ भने अर्कातिर समाजको स्वरूपले पनि दर्शनको रूपलाई प्रभावित गर्दछ । कुनै समाजको भौतिक, सामाजिक, सांस्कृतिक अवस्था वा स्तर कस्तो छ? तथा त्यहाँ“ अन्तर्विरोधहरूको स्वरूप कस्तो छ ? त्यसले पनि दार्शनिक चिन्तनलाई प्रभावित पारेको हुन्छ । यो विषयलाई अरू स्पष्ट शब्दमा प्रस्तुत गर्दा कुनै समाजको वर्गीय स्वरूप कस्तो छ ? त्यसले पनि दर्शनको स्वरूपलाई प्रभावित गर्ने गर्दछ । विभिन्न वर्गहरूका वर्गीय स्वार्थहरू बेग्लाबेग्लै हुन्छन् । त्यसअनुसार दर्शनहरूको दृष्टिकोण पनि निर्धारित हुन्छ ।